Hér er tekinn orðréttur kafli eftir Sigrúnu Helgadóttur.  Hann birtist í bókinni Gönguleiðir að Fjallabaki, árið 1985:

"Öræfin norðvestan og norðan Torfajökuls voru friðuð með reglugerð árið 1979 og nefnd Friðland að Fjallabaki.  Friðlandið er 47 þúsund hektarar og er allt ofan 500 metra hæðar yfir sjó. 
Landið er fjöllótt, mótað af eldvirkni og jarðhita, þakið hraunum og söndum og vötnum. 
Tilgangur friðlýsingar er að varðveita sérstök landssvæði þannig að komandi kynslóðir hafi tækifæri til að njóta þeirra á sama hátt og við gerum. 
Til þess að svo geti orðið gilda ákveðnar reglur um umgengni til að hindra spjöll á náttúru eða röskun á svip landsins. 
Fjölbreytt landslag, sérstakt en viðkvæmt lífríki, öræfaauðn og kyrrð eru megineinkenni Friðlands að Fjallabaki, og þangað leita árlega þúsundir manna til að njóta þessara náttúrugæða. 

Gestir svæðisins eru beðnir um að virða umgengnisreglur friðlandsins og leggja sitt af mörkum svo að tilgangi friðlýsingar verði náð, þannig að allir, bæði við og afkomendur okkar, fái notið náttúru friðlandsins til fullnustu."

upp

Náttúruvernd ríkisins hefur eftirlit með því að umgengni sé góð.  Hún hefur dregið helstu atriði fram til kynningar almenningi:

Umgengni

Akið á merktum vegum og slóðum.

Spillið ekki gróðri.

Truflið ekki dýralíf.

Kveikið ekki elda.

Takið sorp með heim.

Hlaðið ekki vörður.

Spillið ekki hverum og laugum.

Tjaldið á merktum tjaldsvæðum.

Rjúfið ekki öræfakyrrðinaað óþörfu.

Ferðamennska er í eðli sínu röskun á umhverfinu.  En séu þessi atriði virt í hvívetna, bæði innan friðlandsmarka og utan þeirra, þá ætti samviskan ekki að bíta neinn.

upp

 Aðstaða

Aðkoma: Vegir liggja til allra átta.  Sjá kaflann um samgöngur.

Gisting: Sjá kaflann um gistingu. 

Snyrting: Vatnssalerni í hálendismiðstöð og við sæluhúsin (nema við Hrafntinnusker og Áfangagil eru kamrar)

Baðaðstaða: Sturtur í hálendismiðstöðinni, sturta við Landmannahelli og margar sturtur í Landmannalaugum, sem jafnframt er einn landsins frægasti baðstaður.  Vatnið í lauginni er hlýrra eftir því sem nær dregur hausti og á veturna.

Eldunaraðstaða:  Þeir sem gista í sæluhúsunum geta notað eldhúsin í þeim.  Við Landmannahelli og í Landmannalaugum eru útigrill.

Innkaup: Hálendismiðstöðin í Hrauneyjum og búð Fjallafangs í Landmannalaugum.  Sjá betur kaflann um þjónustu.

Neyðarþjónusta: Engin en skálaverðir, landverðir, leiðsögumenn og aðrir sem vinna við ferðamennsku hafa margir þekkingu á fyrstu hjálp og hafa oft bjargað málum. Ekki má ganga að því vísu. 112

upp

Símsamband:
GSM held ég bara að virki ekki á svæðinu, þarf að ath. betur. 

NMT-kerfið virkar ágætlega nyrst og vestast á svæðinu en verr eftir því sem nær dregur fjöllunum.  Yfirleitt betra á auðu svæði eða uppi á hæðum.  Er á mörkunum við Landmannahelli og í Landmannalaugum en í neyð er hægt að fá að hringja hjá skálavörðum.  Venjulegur kapalsími er í Hrauneyjum.
sjá lika Links-GPS-punktar

Rafmagn: Landsins mesta rafmagnsframleiðsla er á mörkum svæðisins, í virkjunum í Tungnaá og Þjórsá.  Þar fyrir er eina rafmagnstengda ferðaþjónustan í hálendismiðstöðinni í Hrauneyjum.  Endrum og sinnum er hægt að komast í rafmagn við Landmannahelli og í Landmannalaugum þegar rafstöðvar eru gangsettar til að dæla vatni.

Hestar:  Aðal reiðleiðin, og sú eina formlega viðurkennda, liggur frá vestri til austurs með Áfangagil, Landmannahelli og Landmannalaugar sem viðkomustaði.  Þar eru gerði fyrir hestana og hey til sölu. 
Óheimilt er að beita hrossum á víðavangi og hleypa þeim út um víðan völl.  Auk áðurnefndra gerð er eitt við afleggjara að Heklu við Valahnúka og annað við afleggjara að Dómadalsvatni í Dómadal. 

Í Landmannalaugum er boðið upp á eins til nokkurra klukkutíma reiðtúra um nærliggjandi umhverfi. Hraunhestar

Ruslamóttaka: Gámar eru í Hrauneyjum, við Landmannahelli og í Landmannalaugum og ruslapokar á tjaldstæðunum.  Vegna fjarlægðar frá sorpþjónustustöðvum er mælt með því að ferðafólk flytji rusl sitt sem mest sjálft til byggða.

Viðgerðarþjónusta: Engin en svæðið er yfirleitt morandi af bílstjórum sem eru hjálpfúsir og hafa oft bjargað málum. 
Ekki má ganga að því vísu. Þjónusta 

Aðgengi fyrir fatlaða:  Einungis í Hrauneyjum þar er braut fyrir hjólastóla.  Allar byggingar þar eru á jarðhæð.

upp