Stuttur afleggjari af Fjallabaksleið, F208, liggur til Landmannalauga.  Þar endar sá afleggjari (við vaðið fyrir fólksbíla eða á bílaplaninu fyrir stærri bíla). 

Frá Landmannalaugum liggja leiðir til byggða bæði til austurs og vesturs og er svipað langt að fara hvora leiðina sem er (60 - 70km. og er sú vestari að öllu jöfnu greiðfærari). 

Til norðurs er hægt að fara lengra inn á hálendið.  Eftir 40 km. er komið að hálendismiðstöðinni í Hrauneyjum.
Þar kvíslast leiðir:  Sprengisandur og Veiðivötn annarsvegar og malbikaður vegur alla leið niður í byggð hinsvegar.  Þá leið koma þeir sem fara vilja til Landmannalauga á litlum bílum.  Þess má þó geta að leiðin frá Hrauneyjum til Landmannalauga getur farið illa með bíla, þó ekki séu á henni vöð eða beinlínis torfærur. 

Allur akstur utan vega er stranglega bannaður.  Engin viðgerðaþjónusta er á hálendinu en hægt er að kaupa eldsneyti í Hrauneyjum. 

Styttri ökuferðir út frá Landmannalaugum sem mæla má með: 
Útsýnistúr upp á brún Ljótapolls, u.þ.b. 8 km. önnur leið. 
Ferð að einhverju stöðuvatnanna í kring.  Flest hafa þau afleggjara.
Landmannahellir.  Þangað eru 20 km.