Fólk kemur til Landmannalauga á allskyns farartækjum og á fæti.  Þangað liggja gönguleiðir, reiðleiðir og akleiðir, mis vel færar, úr mörgum áttum.

Fólk kemur bæði í skipulögðum hópum og upp á eigin spýtur (reiðmenn nær alltaf í skipulögðum hópum). 
Austurleið er með fasta áætlun daglega yfir sumarmánuðina (fljótlega eftir að vegir eru opnaðir í júní eða júlí og framyfir fyrstu viku í september).  Upphafs- og endastöðvar eru Reykjavík og Skaftafell. 
Báðar rúturnar stoppa uppúr hádegi í Landmannalaugum og halda svo áfram, samtímis, tveimur tímum síðar. Miðinn fyrir ferð á milli endastöðva kostaði 6.660 kr. sumarið 2002.  Ferð frá Landmannalaugum kostar þá u.þ.b. helminginn af þeirri upphæð. 

Frá miðjum júlí framyfir miðjan ágúst eru ferðir með Austurleiðarrútu til Mývatns. 
Farið er þrisvar í viku. Ferðin kostaði 5.900 kr. á mann, sumarið 2002.  Þegar kominn er vetur er aftur fært inn í Laugar, þá á snjó á rosajeppum og vélsleðum.  Hægt er að leigja sér slíka ferð, eigi maður ekki rétta farartækið sjálfur.