Það má segja að það sé eitthvað fyrir alla, allt frá malbiki til örgustu torfæra. 
Landvegurinn liggur vestantil á afréttinum, uppmeð Þjórsá, upp að Hrauneyjum.  Síðasti spottinn er malbikaður.  Hann er hluti af malbikuðum vegi sem liggur alla leið niður í byggð vestan Þjórsár. 

Fólksbílafær fjallvegur liggur frá Hrauneyjum til Landmannalauga( F 208), 36 - 40 km langur, eftir því hvoru megin uppistöðulóna virkjananna er ekið (styttri leiðin var ónothæf sumarið 2002). 
Hægt er að halda áfram, framhjá Landmannalaugum, austreftir og niður á þjóðveg 1, u.þ.b. 80 km leið (frá Landmannalaugum), F 208, en þá þarf að nota jeppa með fjórhjóladrifi, því vegirnir eru sumstaðar grófir og fara þarf yfir mörg vöð (ekki djúp á venjulegum sumardögum). 

Önnur jeppaleið, þar sem vegirnir eru betri og vöðin færri, Dómadalsleið,
F 225, liggur frá fyrrnefndum vegi (Hrauneyjar - Landmannalaugar) norðan Frostastaðavatns, vestur um 47 km, út á Landveginn.  Á einum stað kvíslast leiðin. 
Önnur leiðin liggur framhjá Landmannahelli en hin, sem er aðeins styttri, liggur sunnar.  Af þeirri leið liggur afleggjari til suðurs, merktur Hrafntinnusker.  Þetta er torfarin jeppaslóð, opin seinni part sumars.  Hægt er að komast að íshellunum í Hrafntinnuskeri eða halda áfram suður og inn á Fjallabaksleið syðri, F 210. 
Sunnan vaðs á Markarfljóti er hægt að aka til vesturs, milli Rauðufossafjalla og Krakatinds og koma aftur inn á Dómadalsleiðina skammt vestan við Hrafntinnuskersafleggjarann. 

upp

Enn vestar á Dómadalsleiðinni liggur afleggjari til norðurs upp að Valagjá.  Þaðan er fært jeppum áfram veg sem liggur annars vegar til austurs, norðan Dyngja og Löðmundar og inn á Fjallabaksleið nyrðri,F 208, hinsvegar í vestur, norðan Valafells og í Áfangagil.  Þaðan liggja leiðir bæði niður á Landveg og inn á Dómadalsleið, F 225.  Að lokum má geta þess að tveir afleggjarar liggja af Dómadalsleiðinni upp að rótum Heklu, hvar þeir sameinast. 

upp

Flest silungsvatnanna á svæðinu liggja ekki að aðalleiðunum en að þeim liggja afleggjarar.  Við suma þeirra vantar merkingar en þeir sem kaupa veiðileyfi fá kort sem sýna leifilegar leiðir að vötnunum. 
Vinsælasti afleggjarinn liggur upp á barm Ljótapolls, þar sem er úrvals útsýnisstaður.  Þangað upp er ekki fólksbílafært.  Hringvegurinn upp á barm Bláhyls (Hnausapolls) er viðráðanlegri. 
Frá Blautaveri, neðan Ljótapolls liggur sæmilega greið leið út að rafmagnsmöstrunum við Svartakrók og svo meðfram þeim út á Fjallabaksleið nyrðri,F 208,skammt frá þeim stað þar sem farið er út af henni og norðurfyrir Dyngjur, til Valagjár. 

Að sjálfsögðu er allur akstur utan veganna bannaður.
Engin viðgerðaþjónusta er á hálendinu en hægt er að kaupa eldsneyti í Hrauneyjum.

upp

F 26
Sprengisandsleið. Sá hluti hennar sem liggur innan Landmannaafréttar (frá Landvegi að Hrauneyjum) er malbikaður.

F 208
Fjallabaksleið nyrðri. Frá Hrauneyjum í norðri niður á þjóðveg 1 í Vestur Skaftafellssýslu. Stundum kölluð Landmannaleið, að hluta eða heild.

F 210
Fjallabaksleið syðri. Leið á milli byggða í Vestur Skaftafellssýslu og Rangárvallasýslu, sunnan Torfajökulshálendisins en norðan Mýrdals- og Eyjafjallajökla. Kemur hvergi inn á Landmannaafrétt.

F 225
Dómadalsleið eða Landmannaleið. Frá Frostastaðavatni í austri niður á Landveg í Rangárþingi.

upp