Allt er svæðið morandi í spennandi gönguleiðum þar sem hægt er að finna eitthvað fyrir alla. 
Þekktasta gönguleið landsins liggur að hluta til innan þess, þ.e.a.s. Laugavegurinn frá Landmannalaugum til Þórsmerkur. 
Út frá honum liggja lengri og styttri gönguleiðir.  Helst ber að nefna leiðir að íshellum eða hverum við Hrafntinnusker eða upp á Háskerðing eða Söðul, til að fá útsýni yfir hverasvæðið. 

Svo er hægt að ganga austur að Hatti, áfram upp á Skalla og niður til Landmannalauga eða í hina áttina og upp á Háöldu og þaðan niður til Landmannalauga.  Þessir útúrdúrar eru ekki stikaðir og mis vel greinilegir.
Öðrum gönguleiðum í grennd við Landmannalaugar er lýst í meginkaflanum um þann stað í undirkaflanum gönguleiðir.    
Til stendur að stika aðra megin gönguleið til byggða frá Landmannalaugum.  Hún mun liggja vestar, m.a. um Háöldu og Reykjadali og enda í byggð hjá Stokkalæk. www.stokkalaekur.is 
Önnur meginleið sem til stendur að stika er öll innan friðlandsins.  Þar er um að ræða tengingu milli Landmannalauga og Landmannahellis um Mógilshöfða, passlega og fallega dagleið. 
Mikið er um efnilegar gönguleiðir í kringum Landmannahelli en þær eru hvorki til stikaðar né merktar á kort. 
Styttri leiðir, eins og upp á Hellisfjall eða að Löðmundarvatni, eru samt farnar af mörgum. 
Nokkrir fara upp á Löðmund.  Þaðan er stórkostlegt útsýni.  Best er að ganga á hann að vestanverðu. 

Allt í kringum Frostastaðavatn og Ljótapoll liggja gönguleiðir sem gott er að átta sig á þó ekki séu þær stikaðar.  Hægt er að ganga á flest fjöll og inn í flest gil og flest vatnsföll er hægt að vaða. 

Víðast er innanvið dagsferð í náttstað og allsstaðar er eitthvað spennandi að sjá.  Það má þó ekki líta svo á að þetta sé ekkert mál!
Ókunnugir geta hæglega villst og kunnugir líka ef þannig viðrar. 
Veður geta breyst fljótt og orðið ofsavond. 
Þá getur hækkað snögglega í lækjum og ám. 
Svo er minnsta mál að misstíga sig, brenna sig á hverum eða hrapa í klettum ef maður passar sig ekki. 

Allt þetta skal hafa í huga áður er lagt er í hann og á meðan ferð stendur og útbúa sig eftir því. 
Auk þess að hlífa sjálfum sér, ber að sýna landinu virðingu.  Það er auðvelt fyrir gangandi mann að spilla því. 
Notum göngustígana og almennu skynsemina.